يضيق صدري كل ما هبت عليّ من الجنوب ...
نسايم ماملت طعوني وقلبي ملّها
وارقى على مرقاب حزني واتحرى للغروب...
وامسك جدايل هالحياه المدبره وافلّها
واشوف وشلون الليال ادور في الوقت اللعوب...
واجمع مسائل هالبشر في دفتري واحلّها
والعن ابو الحظ الردي!!واستغفر المولى واتوب...
وأقول يا ربي تعين اللي صبر ثم شلّها
ويا سعود قرب لي مدام الوقت والعمر محسوب...
واسمع يا خوك ابيات من جوفي نويت اتلّها
لاصارت الدعوه مابين (ضلوع صدري)و(الهبوب)...
بقولها و:(اللي عقد رووس الحبال يحلها)
وش عاد نرجي من زمن صارت به كبار الذنوب...
انك على الباطل سيوف الحق تنوي سلّها
اسلامك اصبح (متهم)والنور غيّب ومحجوب...
دروبهم ياكثرها...........وادروبنا ياقلها!!!
خوينا تصلاه نار الكفر ونشوفه يذوب...
وحنّا نترجى من (عجوز الغرب )ترهي ظلها !!!
لا عاد به فزعه ولا غيره ؟!وحيلتنا يا دوب...
(نشجب ونستنكر )عساها تنسمع او علّها
صار التنافس بالطرب من اولويات الشعوب...
(الغانيه صفق لها ؟؟والراقصه طبل لها !!)
والموضه تحاصر تقاليد العرب من كل صوب...
تفوح دلتنا زعل واعوانهم تزلّها
والكل منا يشوف نفسه للتخاذل مغصوب...
احلوقنا ماتت عطش !!يالله طلبتك بلّها
يالله سترك من علوم في خواطرنا تجوب...
رحماك سهلها علينا دقها مع جلّها
ويا سعود اخذها من نمط (حكي على لسان القلوب)...
اربع نصايح لحياتك ياعسى توصلّها
المرجله هي (البلد)وافعال يمناك (الدروب)...
والادمي يولد( غريب)ولا تسنع دلّها
والكايده تبغى ولد ماهو طماع وكذوب ...
والرابح اللي نفسه لربه قدر يذلّها
وترى الكرم عند العرب يغطي آلاف العيوب...
وانك بخيل تساوي عيوب العرب ذي كلها
واحذر تحسب ان كل بير ابدنيتك به (ما)شروب...
واذا تجاهلت العواذل ابتموت بغلّها
وانا بودع راس مرقابي اذا حلّ الغروب...
وبقول ياربي تعين اللي صبر ثم شلّها
للشاعر /محمد السهلي
